ስለ አውራ አምባ ማህበረሰብ አዲስ ምዕራፍ ባህሪና ልማት ግንባታ ሁለገብ ማህበር

የአውራ አምባ ማህበረሰብ በ1964 ዓ.ም በክብር ዶ/ር ዙምራ ኑሩ የሀሳብ አመንጭነት በተሰባሰቡ አርሶ አደር አባላት የተቋቋመ ሲሆን መነሻውም በ 5 መሰረታዊ ሀሳቦች ነው፡፡ (1) የሴቶች እኩልነትን ማክበር (2) የህጻናት መብትን ማክበር (3) በጤናም ሆነ በእርጅና ምክንያት ለስራ ብቁ ያልሆኑ ሰዎችን ማገዝና መንከባከብ እንዲሁም ወላጆቻቸውን በሞት ያጡ ልጆችን በማሳድግ ማስተማርና ለቁምነገር ማብቃት (4) መጥፎ አነጋገርና አሰራርን ማስወገድ (5) የተበጣጠሰ ወገንተነኝነትን በማስወገድ ጥቅል ወገንተኝነትን ማጎልበት በሚሉ መሰረታዊ ሀሳቦች ላይ በመነሳት ተመሰረተ፡፡

ከ1964 ዓ.ም - 1977 ዓ.ም ድረስ በተናጠል በያለንበት ቦታ ሁነን ደካማ ወገን በሚኖር ግዜ በመሰባሰብ የዚያን ወገናችንን እርሻ በማረስ፣በመዝራት፣በማረም፣በማጨድና በመሰብሰብ በማገዝ እንዲሁም ከሁለት ግለሰብ ሰፊ ማሳን በመቀበል ማሳውን በመጠቀም እያመረትን ለዚሁ የበጎ አድራጎት አላማ በማዋል ምርቱን ለደካሞች በማከፋፈል ስናግዝ ቆየን፡፡

በ1978 ዓ.ም በህብረት ስራ ማህበር ብንደራጅና በጋራ ብንሰራ የበለጠ ደካሞችን ለማገዝ እንችላለን በሚል እሳቤ በህብረት ስራ ማህበር ተደራጅተን በመስራት በትንሽ ጉልበት በርካታ ደካሞችን እያገዝን ስንሄድ የቆየን ሲሆን ከ1986 ዓ.ም ጀምሮ ደግሞ ሁሉም አባላት አንድ-አንድ ብር በማዋጣት፤የሽመና ስራዎችን በመስራት የገቢ ምንጭ በማግኘት በራሳችን የውስጥ አሰራር ደካማ ወገኖቻችንን እያገዝን ቆይተናል፡፡

ከዚያም በኋላ የማህበረሰቡ አባላት ለረጅም ጊዜ ስንጓዝበት የቆየነው የአብሮነት፣ የፍቅር፣ የመተሳሰብና የመደጋገፍ ሂደትን ለማበረታታትና አቅም ያነሳቸውን ወገኖች በተሻለ ሁኔታ ለመደገፍ ይረዳን ዘንድ የህጋዊ ሰውነት ማረጋገጫ ዕውቅና እንዲሰጠን ስንጠይቅ ቆይተን ጥቅምት 8/1999 ዓ.ም በአማራ ብሄራዊ ክልላዊ መንግስት ፍትህ ቢሮ የአውራ አምባ ማህበረሰብ አዲስ ምዕራፍ ባህሪና ልማት ግንባታ ሁለገብ ማህበር በሚል ስያሜ ለመጀመሪያ ጊዜ የህጋዊ ሰውነት ማረጋገጫ እውቅናን አግኝተን በተቻለን ልክ ሰፊ ስራዎችን ስናከናውን ቆይተናል፡፡

አሁን ላይ ደግሞ ማህበሩ የበጎ አድራጎት ስራዎቹን በአገር አቀፍ ደረጃ በማስፋት ይህን የማህበረሰቡን መልካም ተሞክሮ በአውራ አምባ ብቻ ተገድቦ እነዳይቀር ለሌሎች በማድረስ በስራ እና በውይይት የሚያምን ትውልድ ለመፍጠር ይረዳው ዘንድ በአዋጅ ቁጥር 1113/2011 መሰረት ጳጉሜ 01/2016 ዓ.ም በመዝገብ ቁጥር 7406 በኢፌዲሪ የሲቪል ማህበረሰብ ድርጅቶች ባለስልጣን ተመዝግቦ ህጋዊ ሰውነት ተሰጥቶታል፡፡ ሰፊ ስራዎችን ለመስራት ጥረት በማድረግ ላይ እንገኛለን፡፡

የአውራ አምባ ማህበረሰብ አባላት ማህበረሰቡ ከተመሰረበት ጊዜ ጀምሮ በራሳችን የውስጥ አሰራር ማህበረሰባዊ የአብሮነት ኑሮ በመጀመር ለሰው ልጆች ምቹ፣ ሰላማዊና ፍቅር የሞላበት ኑሮ አስፈላጊ ናቸው ብለን ያመንባቸውን መርሆዎች አንድ ላይ ሆነን ደካማ ከጠንካራ በመደጋገፍ በመተሳሰብ፣ በመረዳዳት፣ በወንድማማችነት ፍቅርንና ሰላምን መስርተን፤ መጥፎ አስተሳሰብና አሰራርን አስወግደን መልካም አስተሳሰብና አሰራርን ተግባራዊ በማድረግ በመሰረትነው ፍቅር ተደስተን ለረጅም ዓመታት እየኖርን እንገኛለን፡፡ ይህንንም ተሞክሮ ነው ለሌሎች ለማካፈል እና ተምረው ሰላማዊ ኑሮን እንዲኖሩ ለማስቻል ያሰብነው፡፡ ምክንያቱም የአውራ አምባን መልካም እሴቶች ወስደን ካልተጠቀምንባቸው ይህ አገር በቀል መልካም ባህል ወይም እሴት እንደ የጋን መብራት ሆኖ ይቀራል ማለት ነው፡፡

ያከናወናቸውን ተግባራት ያንብቡ